Eftir ónýtan sunnudag til flugkeppni, náðist gildur keppnisdagur á mánudag. Veðrið var heldur lélegt, skýjað og skúrir til fjalla en uppúr hádegi létti til suðursins með vaxandi sunnanátt.
Verkefni dagsins var Stóramörk við Markafljót - Stóraborg í Grímsnesi. Eftir nokkrar sviptingar luku aðeins tveir verkefninu, Kristján Sveinbjörnsson á TF-SAX og Steinþór Skúlason á TF-STK. Mótstjórinn Hólmgeir Guðmundsson studdur Þóri Indriðasyni eru í önnum að ljúka útreikningum sem birtir verða innan tíðar.
P.S. Er startstjóri mótsins hafði sent síðustu sviffluguna í loftið og þar með lokið tilgangi sínum, orti hann sér til hugarhægðar.
Hellumót.
lag: Séleg pía er Sigga Geira.
Þeir hittast allir á móti á Hellu
Þeir haldnir eru af flugi dellu
Og svífa að kveldi í svefninn inn
Með sælum draumum um bikarinn
Þar dreymir: múrarinn
Og mikli slátrarinn
Og líka læknirinn
Að lokum flugmanninn
Og reyndar rafvirkjann
Og röska Hólmarann
Og einnig afreksmann
En ekki mig.
Svo svífa þeir yfir grænum grundum
En greyin þurfa að lenda stundum
Kann að þyngist þar bænda brún
Er bæla svifflugmenn þeirra tún
Það bæla: múrarinn
Og mikli slátrarinn
Og líka læknirinn
Og lítið flugmanninn
Og reyndar rafvirkinn
Og röski Hólmarinn
Og afreksmaðurinn
En ekki ég.
Og verkfræðingurinn líkur völvu
Þar vísdóm reiknar á sína tölvu
Að lokum allir fá einhver stig
En ekki á það þó við um mig.
Tómas Waage
